الحريقة / للاستاذ الشاعر مصباح المهدى

الحريقة
***************
*****************
احتياطي البنك قرّب ع النفادْ
احتياطي الصبر جاز وسط الحريقة
العمارة اللي بتطلع فوق بتدفع
ألف جُثَّة وجُثّة تحت
مش مجرد فحت قاعدة أو أساسْ
ف الحقيقة وأد ناس
دَرَجَات سلالم
واللي رابط ناس بناس
مش حب بيزنس
واللي خلَّي الأخ يحرق أخوه تجارة
واللي خلَّي الأخ م الإخوان
يكفَّر سيئاتي
قال عقيدة
باسم رب الخلق يشرب دَمِّي فودكا
باسم رب الخلق ينزع لحمي
لو ع العضم لحم
قال ضحية
شال ولادي ف يوم ميلاد ابنه المبارك
قال عقيقة
لاط زنى باسم الحقيقة
باسم رب الخلق حَوِّل مجري نيلي
ترعة ترعة
فضَّي عيني دمعة دمعة
لمَّا ظبَّط نفسه ف الدور الفوقاني
كان عَليَّا أختار لي قبر
حَلَقَة حَلَقَة
يمدّ تلاتين حلقة كمِّلنا المسلسل
يا حبيبتي
هذا إنساني المسلسل
ف احتياجاته البسيطة
يبدو ف الهيئة العبيطة
كم مهمل
لاعتبارات أنّ مصر اللي احنا فيها
مصر غير مصر اللى كانت
غيط ومصنع
والحساب يجمع ويدفع
دين ملوكها المترفين الشعب تحت
مش مجرد فحت قاعدة
فحت تربة للجميع
كل واحد فينا مش ضامن
يكمِّل يومُه حَيّْ
احتياطي البنك قرّب ع النفادْ
احتياطي الصبر جاز وسط الحريقة
صدري كومة قش والعة
والإدين السودا قالعة
زرع بكره م الغيطان
يا حبيبتي كل دقة ف قلبي
عاصرة كياني عصر
كل خوف عايشه به مصر ف جلدي شافف
كل كلمة بأقولها خايف تبقي تُهمة
مش بريئة البسمة ناصبة فخاخ أفاعي
للّي رايح واللي جَيّْ
أَىّْ أَىّْ كلام وغاغة
مالها داعي
واللي راعي حفل دوللي
هوَّه نفسه اللى ف صلاة الفجر أَذِّن
حَيّْ حَيّْ علي الصلاة
يا حبيبتي الله يكون ف العون غلابة
قلنا ودَّعنا الديابة
طلعوا ألعن م الديابة
يا حبيبتي
كل كرش وكرش بير
قلت راح فين الفقير
استوي ف الرز كبسة
واستوت ع السفرة كبسة بكاب ولحية
قلنا يسقط
قالوا يَحيا
يا حبيبتي نفسي أهرب بيكي وانفد م الجنون
قلبي مش معجون بمَيّةْ بحر مالح
قلبي صالح للمودَّة
قد تكون الشدّة زَرَعت شوك ف حلْقي
بس قلبي مش ضحية
قاعدة من أوَّل مُحَرَّم ف انتظار
دبح شرعي / سَحْل ع الأسفلت /
قَنَّاص للعيون
يا حبيبتي الله يكون ف العون تعبنا
من ساطور الدَّبح مَرَّه ف إيد حرامي
من ساطور الدَّبح مَرَّة ف إيد مُصَليِّ
دا اللي أذِّن للصلاة في حفل دوللي
دا اللي قاعد ف الفضائيات ليلاتي
يستلب عرض الآلاتي والغزية
نفسي أعرف إمتى صلَّى
دا اللى مزروع ف التكية
شيخ مرِّكب دَقْن عيره
قاد مسيرة / فتحها سيرة
عبَّا ف البطن الكبيرة
لحم أهالينا الفقيرة
دَقْن مين اللِّى تقيم العدل فينا
إلاّ لو حَكِّم نبينا ف الصراع
ليس منّا كُل شبعان غيره جاع
ظبَّطوا الأوضاع ف طَبَقة
راكبة طَبَقة / دايسة طَبَقة
والعدالة اللي اختزلها
الرأسماليون في صَدَقة
دي العدالة بتاع عديلة
يا حبيبتي يا نحيلةْ القد
ضغطة ع الفتيلة
تشتعل ثورة جياع
ف اللي رايح واللي جَيّْ
كل واحد فينا مش ضامن
يكمِّل يومُه حَيّْ
احتياطي البنك قرّب ع النفادْ
احتياطي الصبر جاز وسط الحريقة

NEWWORLDNEWS.NET

من الظلمات الى النور اليك هذه السطور المتواضعة كتبت بقلمك وحبك وعنفوان احساسك العالي بلهفة قلمك على الكتابة وشجن الحروف بالاناقة يشتعل نارا من يدخل بين كلماتك نار الشوق الكبير حروفك ملتهبة بشموع احساسك العالي تخطف من يراك الى عالم الابداع لهيب شوقك الزهر والاشجار تبتسم عندما ترى كلماتك لانها تشعر بنشوى تملأ دنيتها وتتالق كتبت الاحساس العالي كله والرقة باشكالها وتتوافد العطور من عباراتك التي توجتها بحروفك المضيئة عاش قلمك الحساس الرقيق وعاشت كتاباتك الانيقة الرقيقة دمت لنا ودام صرير قلمك الرائع

» رسمتك على ورقةبيضا ابتسامة رواها الحنين / للاستاذ الشاعر مصباح المهدى
» كل الشكر للاستاذ الشاعر لطفي الياسيني / للاستاذ الشاعر السوري الكبير ضياء ابو عساف
» رحبوا معي اجمل ترحيب بالاستاذ الشاعر اسعد مصباح جبر ابو محمود
» أهداء الى الشاعر العروبي لطفي الياسيني / للاستاذ الشاعر عباس الدليمي
» اهداء الى الشاعر الكبير لطفي الياسيني / للاستاذ الشاعر ‏فائق الفريحات‏

صفحة 1 من اصل 1