عمي هذا سيد ومن سلالة الرسول (ص) معقولة هيج يسووي!؟؟
عمي هذا سيد ومن سلالة الرسول (ص) معقولة هيج يسووي!؟؟
اللي دنشوفه هالأيام بالأخص بعد الأحتلال كثرة من يدعون انهم سادة و ينتمون لسلالة الرسول محمد (ص) و انهم ماشين على حب جدهم بحيث لاهم حرامية و لا جواسيس ولا ياكلون اموال الشعب كودن هذه كلها بعيدة كل البعد عن نهج اجدادهم ومن غير مناقشة!.
رؤساء الأحزاب و مساعديهم واعضاء القيادة و اغلبية جماعاتهم يدعون بأنهم سادة وكل واحد حاطلة لقب للدلالة كونه الأمام علي( كرم الله وجهه) جده و بس تسأله يطلعلك شجرة مزيفة للعائلة و يطلع جده بن عم اهل البيت شك المنشار!!.
والحقيقة واضحة وضوح الشمس كودن قبل الأحتلال نعرف اغلبيتهم ( زيتوني و مسدس طارق وصورة الريس على گلبه و مسؤل قطاع أو منطقة يطارد الأفرارية و كتابة تقارير وجمع اكبر عدد من ابناء منطقته لأرسالهم الى جبهات القتال ضمن صفوف الجيش الشعبي ) لا نسب ولا عمامة مختلفة الألوان وعلى العكس كان مايريد يسمع هالحچي و لكن لأنه اليوم هالتسمية بيها خبزة زينه و مناصب وامتيازات واحترام من قبل المتخلفين و اللوگية و المستفيدين ، صارلك هو وبس و ليش لاء مازال اغلبية مجتمعنا يمشون ورا هالحرامية وبالتالي هو هم صدگ نفسه و أقتنع بأنه فعلا سيد و حاله حال المئات لابل آلآلآف من نفس حالته و ... خلي ياكلون مازال خالهم طيب!!.
الطمة الكبرى هذولة حتى من يغلطون (اغلبية تصرفاتهم خطأ إلا ما ندر) الناس ما تصدگ و رأسا :
- لا عمي لاء هذا سيد شلون يغلط؟؟ ابدا مايصير ، هذا ماشي عدل ويخاف الله و اكو ناس تكره السادة وإلا مستحيل السيد يمشي اعوج و ياكل من مال الحرام!!.
- كلها دعايات مغرضة، قبل فترة شفتوا شلون بنفسه يطبخ التمن والقيمة ويوزعها علينا، هذا اصيل وشوفوا وجهه يشع نور!!.
وأني اگول: نعم السادة الحقيقيون مايمشون اعوج ولا يأكلون الحرام وحتى ما يدخلون بالسياسة وظلم البشر... أما الطبخ و النفخ وصرف الأف الدولارات على هالفعاليات فكلها من اموال الحرام لكونه أكبر حرامي و نصاب!و جاسوس ويقبض بالدولار!!... واللي يعيش بالحيلة يموت بالفگر!!.
يا ناس يا عالم هالفئة شجابهم عالسادة و آل البيت؟؟اقسم بالله بس تتبدل الأمور شوية كلهم يذبون العمامة على صفحة و يبدلون القابهم و يتخذون القاب اخرى تتلائم مع الوضع الجديد و الأيام بيننا!!.
رسالة من بغداد من الأخت ( ن.ح) ننشرها مثل ما ارسلتها مع شكرنا وتقديرنا لها:
سيد طاهر .. مواطن عراقي من سكنـة مدينة الشعـب في محافظة بغداد
سيد طاهر هذا صاحب أكبر محل لحوم ومشويات بالمنطقة .. يومية يستقبل الناس بوجهه السمح وضحكته المعروفـة , يساعد الفقيـر , مايعرف يغـش بالميزان مثل بقية الگصاصيب ، بل العكس ، أكثـر الاحيان اذا تشتري منه كيلـو لحم ينطيك زيادة ١٠٠ غرام فوگاه عن الحـلال والحرام ، وعلى هـذا الأساس المنطقة من ساسها لراسها ماتاخـذ لحـم ولاتاكل كباب الا من لحوم سيد طاهر.
قبل شهر بالتحديد ، صحـت المنطقة على خبر صادم مفاده إنه طاهر مسجـون بمكافحـة الشعب وسامطيـن أبو أبوه لان كابسيه بالجرم المشهـود ذابح تلث مطايا هرفيه بمنطقة الحسينيـة ومحملهن بـ كيا حمل حتى يجيبهن لمحله ويبيعهن على إنهــن لحم عجل عراقي خالـص ( أمانة الله ورسوله) !
وره عشرة أيام .. طلع طاهر من السجـن ورجع لعائلته ولمحله ورجعت ضحكته تارسه وجهه ولا كانه اي شي صاير ، وهذا كله بفضـل المحامي الشاطر اللي لزم دعوته وجابله كتاب من مجلـس إدارة متنزه الـزوراء يأيــد انه طاهر متعاقد ويه المتنزه لتجهيزهم بلحوم صالحة للاستهلاك الحيـواني حتى تتغـده وتتعشه بيهه الإسـود والنمور الموجـودة بحديقة الحيوان!!
وبناءً على ماتقدم أصدرت المحكمة المختصه قرارها ( باسم الشعب ) ببراءة طاهر وإسقاط كافة التهم المسندة اليه في هذه القضية وإخــلاء سبيله من الحبس فورا" مالم يكن محبوسا" على قضية اخرى!!!.
حالياً .. طاهر حاط قطعة على عرض الشارع مكتوب بيهه لمناسبة شهر محرم الحرام تعلن لحوم الطاهر عن إن سعـــر كيلو لحم العجل العراقي ٨٠٠٠ آلاف دينار ، وخاتمهه بعبارة إن للحسيـن حرارة" في قلـوب المؤمنين لن تنطفيء أبـدا".
----------
خو شفتوا سيد طاهر المسكين طلع برىء و مظلوم و إلأ شوية تخرب سمعته وتروح كل حسناته!!.
[size=32]وحق الحق لا انت سيد ولا انت طاهر ..[/size]
الى اللقاء في سالفة اخرى من سوالف زمن العجايب إذا الباري خلنا طيبين راح انشوف عجب العجاب..
اودعناكم بأمانة الله..
أخوكم
رئيس التحرير
المشاركات
نقاط
التقييم
موضوع: عمي هذا سيد ومن سلالة الرسول (ص) معقولة هيج يسووي!؟؟ : جلال جرمكا 
الأحد 31 يوليو 2022 - 5:16
