شنو لازم خلصتوا طحين!!؟؟ تم إنشاءه بتاريخ الجمعة, 05 شباط/فبراير 2016 23:25

شنو لازم خلصتوا طحين!!؟؟

 
[size=32]ياسادة يا كرام، السلام عليكم[/size]
من النكات اللي ما أنساها وأحنة صغار في المرحلة الأبتدائية في مدارس بغداد:
في أحدى محلات بغداد القديمة و طبعا أيام زمان ، فد شقي من شقاوات بغداد بملابسه البغدادية وحاط الجراوية على جتفه وديمشي وهناك فجأة ظهرت مرية كلش حلوة من ورا بردة الباب ، غمزتلله و كالتله فوت بسرعة تعال  جوة رايدتك!!.
يا سبحان الله شلون رزق من الصباحيات.. ولك حمودي صدگ چذب؟؟؟.. خش و لا تتردد!.
هو هم ماكذب خبر التفت يمنة و يسرة ورأسا جفت جوة!!.
طبعا البيت شرقي وبيها ساحة بالوسط ،وهو محتار من هالصدفة وبعد أقل من دقيقة أندگ الباب!!.
المرية صاحت : ولچ سودة الصخمچ صبيحة.. هذا رجلي عرفته من دگة الباب وهو ايدة والسچين ما يعرف أبو..شراح أنسوي ياربي؟؟.!!.
حمودي صار مثل بلاع الموس .. مايعرف شلون يتصرف ، هاي شلون ورطة من الصباحيات ياترى بوجه من أمصبح؟؟؟!!.
گال : ولچ تحركي سويللي جارة ، تحركي .. وبعدين؟؟أصعد للسطح ومناك أگلب عالجيران؟؟ لو أواجه وأسوي وجهه خريطة باهالسچينة؟؟؟.
گالتلة: لاء دير بالك أتصير فضيحة .. بسيطة تعال أگعد هنا بصف هالرحاة وأغطيك بعباية وأنت أبدأ بطحن الحنطة واذا سألني رجلي أگوله هذه مرية چبيرة بالعمر تطحننة طحين ، وأنت لاتحچي و لا تتحرك هي چم دقيقة  وراح يطلع وبعدين نأخذ راحتنة!!.
حمودي بدا يطحن ..ساعة، ساعتين، ثلاثة والأفندي ماخذ راحتة تغدى وشرب جاي وورة الظهر گال رايح للگهوة وفد ساعة أرجع!!.
هو طلع ، وحمودي المسكين مكسور ظهرة من الگعدة و التعب..ما صدك شلون فلت خلال ثواني تطلع خارج الحوش!!.
ظل المسكين يعاني من وجع بظهره لأكثر من أسبوع خلولة لزگة جونسن و أنواع المراهم وراجع حبيب المضمد اللي گاله ماكو شي حمودي لازم شايل شىء ثگيل!!.
يا شي ثگيل وحگ أبو خيمة الزرگة طاحن گونيتين أم  قلم أحمر طحين!!!.
بعد مدة صدفة هم فات بنفس الدربونة والظاهر تعمد يفوت مناك حتى يشوف شكو؟؟ ماكو؟؟.
وفجأة شافها واگفة ورا البردة.. وهي شافته وگالتله حمودي تعال بسرعة هالمرة يستحيل يرجع رجلي من الشغل!!.
تبسمر حمودي بمكانه و فتل شواربه زين .. ويستحيل ينغلب مرة ثانية.
عدل عرقچينة وگاللها:
[size=32]شنو لازم خلصتوا طحين!!؟؟...روحي بابا روحي على شغلچ أني حمودي ابو قامة ما أتقشمر مرتين ،شلگيتيني قشمر؟؟؟.[/size]
ماكو خلال أقل من دقيقة راح وأختفى من المكان!!
[size=32]رباط الحچي:[/size]
[size=32]جماعة المنطقة الخضراء الكل من غير أستثناء جميعهم صايرين مثل الأخت صبيحة مايتذكرون الشعب ألا وكت الأنتخابات والتصويت.[/size]
قبلها بشهر يبدأ الأخوة النشامي بتوزيع القنادر و البطانيات والصوبات.. أخوان شنو الفيلم؟؟.
يا فيلم ؟؟ أحنه من والى الشعب لعد شلون؟؟.
من تروحون فدوة الى صبيحة والاعيبها ، خططكم مكشوفة بس شنسوي وية أهلنا واحدهم گلبه گلب سمچ يصدگون بسرعة و يتقشمرون ثانية وثالثة و رابعة..!!.
[size=32]نعني ماكو چم حمودي يفتر ويخبر الناس ويگوللهم:[/size]
[size=32]ولكم بابه هذولة قشامر ، حرامية ، جواسيس ..عليش تنطوهم أصواتكم مقابل زوج طگاگية لو صوبة لو نفر كباب؟؟.[/size]
أني متأكد أكو الأف مثل حمودي ولكن وية من تحجي؟؟... واخيرا:


[size=32]نايب يزور الناس بالإنتخابات[/size]
[size=32]يوعد چذب بوعود يركع صلاوات[/size]

[size=32]چذبوا علينه اهواي باعوا وطنه[/size]
[size=32]نايب جليل انصاف بايگ نفطنه[/size]

[size=32]ياشعبي انهض گوم اگلبهه بيهـم[/size]
[size=32]شعب اليريد ايعيش ثاير عـليهم[/size]

[size=32]أودعناكم عيوني..والى حچاية أخرى من القلب للقلب أمودعين بالله و رسوله.[/size]
[size=32]رئيس التحرير[/size]

[size=32]   [/size]