شفايتنا لو حاكمنا مطي (أجلكم الله) ..صدگوني چان الوضع أختلف! جلال چرمگا

شفايتنا لو حاكمنا مطي (أجلكم الله) ..صدگوني چان الوضع أختلف!

تم إنشاءه بتاريخ الأربعاء, 15 أيار 2019 19:32 كتب بواسطة: جلال چرمگا

شفايتنا لو حاكمنا مطي (أجلكم الله)..صدگوني چان الوضع أختلف!
يگولون للصبر حدود، وهذه مو بس أم كلثوم گالتها وغنتها ، لاء حتى في القرآن الكريم مذكور ( الصبر والصلاة) وانلاحظ الصبر قبل الصلاة وهذه اكيد بيها حكمة وإلا وين أكو أحسن من الصلاة والعبادة!؟.

« «يا أيها الذين آمنوا استعينوا بالصبر والصلاة، إن الله مع الصابرين» (البقرة: ))١٥٣
مع ذلك أكيد للصبر حدود ، يعنى الى متى بس نصبر ونصبر وبعدين ماكو نتيجة؟؟.
ماكو شعب بالعالم عنده صبر بقدر اهلنا وناسنا بالعراق؟؟ يستحيل!.
اجيال واجيال ماشافوا راحة تذكر إلا القليل والقليل جدا ولفترات محدودة ، حروب وانقلابات و سجون واعتقالات و ضياع واختطافات ومصايب وبلاوي للضالين!!.
شفنا كلشي وكلاشي من حصار و جوع وانفلات أمني وبطالة و ...الخ.
مع ذلك كنا أنصبر نفسنا وأنگول بلكي السنة القادمة أحسن من هذه السنة؟؟ ولكن لاء والف لاء چانت أتعس من السنة الماضية وهكذا.
أما بعد الأحتلال!! لا هذه مصيبة وابو المصائب وأزيد.
انقشمر وأنصبر نفسنا وأنگول أكيد هذه الحكومة راح تكون أحسن وأكيد راح يحاربون الفساد ويحيلون الحرامية الى القضاء ويستقر البلاد!!.
لا والله هذه أتعس من الحكومة السابقة وماكو فرق إلا بالتصريحات النارية والقبض من دبش!!.
ياناس يا عالم:
چم دوب نصبر ترة بعد ما بينا نصبر و الحل؟؟؟...النه الله يا خلك الله!.
رسالة من أحد أصدقاء المجلة من محافظة البصرة العزيزة (ع . ل) ارسلنا حكاية و سالفة كلش حلوة ولابد أن نطلع عليها وبعدين الحكم لكم أنتم قرائنا الغاليين:
يوم من الأيام الأسد گال لزوجته احنه لازم يصير عدنه ولد حتى يحافظ على الغابة ويصير الملك من بعدي، وبعد فترة من الانتظار والصبر جابت زوجة الاسد لكن الغريب بالأمر ان المولود الصغير طلع لونه مخطط ويشبه النمر!!.
الأسد استغرب ودخل ابگلبه الشك وسأل زوجته گلها:
شو هذا ابنه يشبه النمر؟؟؟.
گلتله احترم نفسك ولا يروح بالك بعيد ترى شرفي خط أحمر!!.
سكت الاسد وگال انتظر موسم التزاوج القادم بلكي يصير عندي ولد يشبهني.
وبالفعل حبلت زوجة الأسد وجابت مولود والامر العجيب هذا المولود طلع منقط ويشبه الفهد!!!.
الأسد عاين على زوجته... گلتله :
كلشي ولا تتهمني بالخيانة ترى أحيلك للنزاهة حتى تاخذ جزاءك!!.
المهم گال راح انتظر للموسم القادم واجت ايام وراحت ايام. ويوم من الأيام الاسد طلع للغابة وبنص الطريق تذكر أنه من طلع ما باس زوجته فرجع للبيت والكارثه الچبيره أنه وصل لگه المطي ( حمار) عنده بالبيت!!!.
گله ها ولك شتسوي ببيتي ؟؟.
گله يا حضرة الملك لا يروح بالك بعيد ترى آنه والنمر والفهد مشتركين بسلفة ويه مرتك واليوم جيت أسدد السلفة!!.
الأسد صارن عيونه بگصته وراح الزوجته وگلها ولچ تسوون سلفة أنتي و النمر والفهد والمطي وما تسجلون اسمي وياكم .. آنا زعلان عليچ!!؟؟.
گلتله لاتزعل حبيبي ترى اذا زعلت انه راح اضوج واذا ضجت احتمال البيبي اللي ابطني يطلع يشبه المطي!!!.
صاحب المكتوب يگول هاي الغابة شلون راح يصير براسها خير اذا يحكمها هيچ أسد ؟؟؟. وليمته مرته راح تجيب أسد أخو اخيته ويحافظ على الغابة؟؟؟؟.
گضت سنين عمرنه كلها بين ابگع ومنقط . معقوله على غفلة ومن غير مقدمات يجينه اسد ويحافظنه على البلد لو هم مطي ( اجلكم الله ) ونضيع احنه والبلد!!.
أخوية العزيز:
لاوالله اللي ديحكمون البلد نصهم وأكثر مطاية ونص (اجلكم الباري) وترة كلمن يگول بقى بينا صبر گوله تكذب وستة!!.
الى اللقاء في سالفة أخرى.. في أمان الله عيوني.
أخوكم
رئيس التحرير