رفيق خروشوف ، بصراحة الخدمات بمستشفاكم زفت!!!
[size=32]رفيق خروشوف ، بصراحة الخدمات بمستشفاكم زفت!!![/size]
بعد ثورة تموز عام 1958 بقيادة الزعيم عبدالكريم قاسم ، انفتح العراق على الأتحاد السوفيتي بشكل علني والحكومة الجديدة دارت ظهرها للأنگليز وأبوناجي و الأستعمار!!.
صرنا ولأول مرة أنشوف بشوارع العاصمة بغداد و بقية المدن سيارات الفولگا والمسكوفيچ وحتى سيارات السكودا واللي كانت صناعة تشيكية.
المهم صرنا دهن ودبس ويه الأخوة والرفاق في موسكو.
يا لفرحة الرفاق الشيوعيين بالعراق واحدهم مايتحچى وشغله الشاغل مدح الرفاق هناك زائدا صناعاتهم بالأخص في مجال السيارات و حتى الأسلحة من السيمنوف والكلاشينكوف و بقية الأسلحة الثقيلة.. يا لهذه الفرحة اللي ماكو بعدها فرحة عاش الأتحاد السوفيتي والرفيق خروشوف و بريجنيف و غروميكو وكوسيجن و حتى فراش والچايچي داخل اروقة هذا المجلس العظيم.
بذيچ الفترة الحكومة نست لندن ودكاترة لندن ، لا عمي لاء دكاترة خوالنا بموسكو أحسن من دكاترة ابو ناجي وموبس هاي حتى أدويتهم وأجهزتهم الطبية احسن بألف قاط!!.
الحكومة صارت ترسل المرضى للعلاج هناك وفعلا مستشفياتهم كانت رائعة بالأخص المستشفيات العسكرية لأنها كانت مخصصة لقيادة الحزب الشيوعي وعوائلهم.
أحسن الدكاترة بكل الأختصاصات وأفضل ألأجهزة و أجمل الممرضات والأهم أبنية حلوة وداير مدارها حدائق وأشجار تفتح النفس!.
في عام 1959 وفي فترة حكم الرفيق نيكتا خروشوف ، تمرض أحدى الشخصيات العراقية وكان لازم يتعالج خارج العراق.
أمر الزعيم نقله الى موسكو مع توصية السفارة العراقية بمتابعة الشغلة من حجوزات وزيارات و توصيات كونه شخصية عراقية ولازم يتعامل أفضل معاملة وحتما سيرقد بالمستشفى العسكري اللي ذكرناه حيث يليق بهذه الشخصية المرموقة.
يصل الأخ الى موسكو ويستقبل من قبل السفير وطاقم السفارة و عدد من المسؤلين بالعاصمة موسكو.
يخصصوله غرفة رائعة تطل على اجمل حديقة حيث مناظر خلابة من ورود واشجار باسقة ونافورات و طيور ملونة...وألأهم برعاية كبار الدكاترة و طاقم طبي في كل الأختصاصات!!.
الرفيق خروشوف كان سمع بقدوم هالشخصية واهتمام الحكومة العراقية لذلك خصص وقتا لزيارته وللدلالة على متانة الصداقة مع العراق والحكومة الجديدة وعلى عناد الأستعمار والرجعية !!.
يصل الرفيق بمصاحبة وزراء و كبار المسؤلين و يدخل على الشخصية العراقية مع باقات ورود وألأبتسامة على وجوه الجميع و المصورين دك صور ، يمكن اخذوله مئات الصور هذه عدى مصوري التلفزيون و مندوبي الأذاعات لتغطية هذه الزيارة!!.
بعد السلام والتحية والسؤال عن الصحة وبالأخير رايه بالمستشفى!!.
بالحقيقة رده كان صدمة للجميع لكونه وبكل صراحة گال:
رفيقي اجمل مستشفى لكن الخدمات والرعاية زفت!!.
ضحك خروشوف ضحكته المعروفة وبالمقابل أنحرج كبار الدكاترة ومدير المستشفى وكل الكادر.
انتهت الزيارة وقبل ما يترك المستشفى طلب اجتماع مع الدكاترة لأمر مهم.
اكيد الكل تتراجف ياربي شنهية عقوبتهم والمهم وين هو التقصير؟؟.
فأجأهم خروشوف وكال:
أني اعرف ماكو أي قصور ولكن أريد أسأل أنتو امخصصيلة ممرضات لو ممرضين؟؟
كان الرد أنهم امخصصيله أمهر الممرضين ذوي خبرة .
ضحك خروشوف وگال:
اذا وجدنا الحل!! ، رفاق خصصوله أجمل الممرضات وبالجملة وحدة تشربه الأدوية ووحدة تسويلة تدليك ووحدة تگعد گبالة للتسلية ووحدة تنظف الغرفة وهكذا!! صار معلوم؟؟.
الكل ارتاحوا ووعدوا بأنهم راح يلبون أوامره خلال دقائق.
گبل مايطلع خروشوف گال:
راح أمرلكم بعد كم يوم وأنشوف رأيه بالمستشفى!!؟.
فعلا خلال نص ساعة راحن عدد من الحسناوات حول الضيف العراقي والأخ صار ما مصدگ ياترى هو وين بالجنة لو وين؟؟ عمي لو هيچ مستشفى لو لاء والله لأبقى أشهر أتعالج على حساب الحكومة وعاشت الشيوعية!!.
بعد أيام رد خروشوف بزيارة ضيف الرفاق..
ما أن دخل حتى بادره الضيف بالمدح والشكر لأدارة المستشفى ورعايتهم وعنايتهم وكلها بسبب توصياته القيمة!!!.
ضحك خروشوف وماطول بزيارته ووجه الشكر لأدارة المستشفى بهذا الأهتمام و تمنى رضا الضيف العراقي و ليسقط الأستعمار وأبوناجي و من لف حولهم والى الأمام وما النصر إلا من عند الباري!!.
وبالمناسبة كل الأجراءات و الفحوصات والدكاترة ماكانت تكلف الدولة العراقية شىء يذكر قياسا بهالأيام والأخوة النشامى اللي واحدهم اجانه على ظهر دبابة أمريكية.
واحدهم يعمل عملية و تكلف الدولة كذا مليون دينار!!.
والأخر مايستحي و هو نائب بالبرلمان يروح للخارج ويبيض جزء من جسم زوجته ويقدم بيها قائمة لرئيس البرلمان!!.
صدگ لو گالوا الى استحوا ماتو ، الله عليكم هي هذه تصرفات؟؟.
شفنا هواية وراح أنشوف أكثر من هالحرامية اللي جابتهم أمريكا ليحكموا العراق.
من طاح حظچ أمريكا مو مرة واحدة لا والله الف مرة ومرة.
[size=32]الى اللقاء بسالفة أخرى..اودعناكم ..[/size]
أخوكم
رئيس التحرير
المشاركات
نقاط
التقييم
موضوع: رفيق خروشوف ، بصراحة الخدمات بمستشفاكم زفت!!!: جلال جرمكا 
الإثنين 20 أبريل 2020 - 1:51
