عَ قَسْطَل صَفُّوْرْيِه / للزميل الشاعر الفلسطيني المخضرم الاستاذ سعود الأسدي

سعود الأسدي

عَ قَسْطَل صَفُّوْرْيِه / للزميل الشاعر الفلسطيني المخضرم الاستاذ سعود الأسدي

-----------------------------------------------------------------------------------------

مَريّت عَ القَسْطَلْ بِدربي مْرور وِالشَّمسْ تِحرقْ ذَنْبَةِ العصفورْ
لاقيتْ خِتياري وْسألتو مْنين ؟ قَلْلِي : بَلَدْنا إسِمْها مشهورْ
وْإسْم الكريم ؟ قامْ وْخَطَمْ مِترينْ وْقَلْلِي : اطْلَّعْ هونْ شُو محفورْ
وِقْرِيت إسْمُو عاجْدار العِيـنْ وِمْسَوَّرْ بْعوسَجْ عَ جَنْب السُّورْ
وِبْجًنْب إسْمو في شحادِه حْسينْ قَلْلِي : بَقَى مْخَضِّرْ وَنَا ناطورْ
وْقَلْلِي: يَ حَسْرَهْ باقي عندي دينْ قِرْشينْ لَشْحادِهْ ثَمَنْ قَفُّــورْ
وْقَلْلِي :اطْلَّع في بَعِدْ إسْمـينْ وِقْرِيت طه وْجَنِبْ إسْمْو نُورْ
وْقُلْتلُو : دَخْلَكْ هَذولا وينْ قَلْلِي : بْعِلِمْ أللهْ اللي عِلْمُو بْحُورْ
وِصْفَنْت نِتْفِه وِشْرِبِتْ بُقّينْ وْمِنْ بَعْدْ لحظَه قُلْتِلُو دَسْتورْ
هِالمِسْبَحَه وْسَبَّحْتْ لكنْ بينْ عِيْنيْهْ كُنْت اقْرَا أمْلْ مَسْتورْ
وْمِثْل السّنْونُو رَفّ بِجْناحْينْ وْقُدّامي عَالتُّوتِهْ شَهَقْ شحرورْ
وْنِزْلُوا عا جَنْبِ المّيِّ رُقْطِّتينْ وِبْآخِر القَسْطَلْ عَرَجْ قَرْقُورْ
وْناوَلْتُو مِسْبَحْتُو وْدَمْع العينْ ساحِحْ على خَدُّو يخُطّ سْطور
وْشْوَيِّ قَلْلِي: باجِي كُلّْ يومينْ بَشْرَبْ وْعَاْلَبِلْدِهْ بَرُوْح آزورْ
وْيا ما بَقيتْ اشرَب بْهَالثِّنْتينْ عشرين حَفْنِهْ من بَعِدْ لِفْطْورْ
وْقام وْمِشِي تا صارْ وينْ وْوينْ تا طَمَسْ عَنِّي وِالطّريقِ وْعُورْ
وْظَلَّتْ بِسَمْعي باقي عندي دين قرشين لشحادِهْ ثَمَنْ قَفُّورْ
وْظَلَّتْ بِسًمْعِي باجي كل يومينْ بَشْرَب وْعالبلدِهْ بروح ازور
ويا ما بَقيتْ أشْرَب بْهَالثنتينْ عشرينْ حَفْنِهْ من بَعِدْ لِفْطُورْ
ـــــــــــــــــــــــــــــ
صَفّوريِة : بلدة فلسطينيّة كبيرة ،كانت تملك أكثر من 120 دونم أرض خصبة، هُدِمَت في ال48 وهُجِّر أهلها في بلاد الله الواسعة.
والقسطل: اسم نبع صفورية وهو نبع نقيّ غزير كان يروي السكّان والمكانْ ولا ينقص.

تحية الاسلام والعروبة
ابرق اليك تحية خاصة من مسرى رسول الله سيدنا محمد صلى الله عليه وسلم
ومن مهد السيد المسيح عليه وعلى امه افضل الصلاة والسلام
ان كل مفردات ثقافتي والمعاجم قاطبة لا تفيك حقك من الشكر والاحترام والاكبار
لك مني عاطر التحية
واطيب المنى
ودي قبل ردي
باحترام المناضل الجريح
د. لطفي الياسيني