ابخـتـك يـســيد : ميسون نعيم الرومي

ابخـتـك يـســيد
ميسون نعيم الرومي
ابخـتـك يـســيد

ابختك يسيد ننخاك
شعبك تعب كافي ظلم

كلهم شـَـلع كلهم قـَـلع
اكـْلـَـوْ لـَحـَمـنـَه والعـَظم

كلمن اوعـنده فد جيش
ضد الشعب يحمي الحكم

كلهم يسـَـيد سـراق
تعرفهم انت بالإسم

يتحاسب الباع الوطن
والبدوه من (راس الهرم)-

حـَرفـَـوْ (يسيد) بالدين
شـِـغلوا شعبنه (باللطم)-

-(لحسين) ثورة اصلاح
وانت إبن اهـل العلم

صار الوطن عَ الهاويه
بيدك اتنقذه امن العدم

عين (الفقير) الترجاك
تتنطرك كل (الزلم)-

مات الزرع صارت بور
والوطن يبچي منهدم

حتى (النخل) هم عدموه
(دجله) او(فرات) الما سلم

انت (يسيد) مو گلت ؟
لتجرب امجـَـرَّب منهزم

هذا الوطن نفضوه نفض
كلهم يسيد مـُـتـَهـَم

حتى (القضاء) المسخوه
سحگوه سَحِگ تحت القدم

نص الشعب صار (ايتام)-
تـِـلـْگـِط زبل تنبش رمم

صار (الوطن) تحت الصفر
انباعت كراسي اويه (الذمم)-

ايران كوشت عَ الوطن
صخمت وجهنه باصخام

-(نـوّاب) تكـرف آلاف
ماكو عـِلـِم لاكو فهم

هذا الشــعب كله اوياك
يـِنـْـظـَـف وطنه امن الرمم

ابختـك (يـســـيد) ننخـاك
تحمي الوطن تحمي (العـَـلـَم)-

تحمي الوطن تحمي (العـَـلـَم)-
-------------------
1/حزيران / 2018
ســــــــتوكهولم