توت توت
قطر الغلابة الشقيانين
في الخدمة من سنين
كل يوم في الميعاد
شايفه على القضيب
واقف يبكي
إهمال السنين
الصوت فيه إستغاثة
ما يسمعه غير الأمين
كل يوم يصرخ
والمسؤلين مش سامعين
الفساد للركب
وقطر الغلابة
يبكي من سنين
من الأربعينات
بين البلاد سواح
الراكب موظف
مش مرتاح
وطالب علم
أهله غلابه ملاح
وعسكري في الجيش
بيغني مع زميله
موال كله جراح
وست في الأرض
جالسه وجنبها سمنتها
ولبنها وجبنتها
رايحه السوق تبيعها
وترجع لولادها
بهدوم الشتا
وبطانيه طبقتين
أصل الغلابة حلمهم
بسيط ما يعرفوا
الطمع ولا الملايين
عايزين شويه دفا
والضحك من القلب
ونسيان الهموم والضين
قطر الغلابة زهق
الحمل أصبح ثقيل
الناس قلوبها جفا
قطار الغلابة أشتكى
وطلب نهاية خدمة
وفي المتحف يلاقي
الأغنياء للفرجه
لكن طلبه إترفض
ورجعوه للخدمة
قطار الغلابة
طلب صيانة
من مسؤلين فاسدين
عملوا صيانة على الورق
ورجع القطر على القضيب
واقف حزين
توت توت
توت توت
أنا قطر الغلابة
دم الغلابة دمي
مش بإيدي أضرب
ولا بإيدي أجري
ولا بإيدي أدوس
على طفل يبكي
ولا بإيدي أعمل
صيانة لنفسي
ولا بإيدي
أققفل مزلقان
ولا أنبه عامل
من الهموم نعسان
ولا أنبه سواق متهور
عايز يعدي قوام
ولابإيدي أموت
عسكري همام
توت توت
توت توت
يا أهل مصر
دي حكايتي
أنا مظلوم ودمكم
مش في رقبتي
في رقبة ناس
كل همها تعيش
ما همهم فقير
يموت أو يعيش
توت توت
مر الزمن علينا
وإحنا في النازل
الغرب طلع القمر
وإحنا في النازل
الجبال تكسوها الجمال
وإحنا في النازل
قربت أأقول جاي
قربت أأقول باي
نفسي أشوف بلادي
جنب القمر والشمس
نفسي أشوفها جنة
وأغني تمر حنة
وأشوف الفقير راضي
وأشوف الغني عاطي
المال مال الله
خلاه للوطن والناس
والي مايخدم بلاده
ما ينزعل عليه
لو بقى في الرجل مداس
يارب هون علينا
وإجعل فرجك قريب
أنت يارب الحامي
لكل المصريين
من غيرك ندعي له
ونقول في الأخر
أمين
طلعت محمود
المشاركات
نقاط
التقييم
موضوع: توت توت 
الجمعة 18 يناير 2013 - 23:39
