دولمــــة ـــــــــــــــــ اكو ولد صديق ساكن بقضاء المحمودية .. يگــــلي وره السقوط المحمودية والنواحي التابعة الها كلها تقر

دولمــــة
ـــــــــــــــــ
اكو ولد صديق ساكن بقضاء المحمودية .. يگــــلي وره السقوط المحمودية والنواحي التابعة الها كلها تقريبا" سقطت بيد تنظيم القاعــــ-ــدة ، ويومية چنت أطلع للشغل الگالي راس راسين مذبوحة ومعلگـــــه براس الشارع وكاتبين عليها هذا جزاء اللي يتعاون ويه المحتل الامريكي .. وأكو جامع بصـــــف بيتي الشيخ مالته ٢٤ ساعة يصمطيــــــزه ويصيح ويسب ويفشر ويدعي عالامريكان واذنابهم المتعاونين وياهم .. وأي واحد أشوفه بالمنطقة يظل يحچيلي عن الجهاد ومحاربة الغزاة الصليبيين الكفار الماعرف شنو ..
وآني على هذا الأساس ( (والكلام لصديقي ) اروح لشغلي وارجع لبيتي واسد بابي ، ولا امريكان ولا ذيولهم ولادوخة الراس هاي ..
يگول مـــــرة من المرات امي چانت مسويه جدر دولمة من هاي الجدورة اللي يخلون بيها سبعت الاف مادة ، شجر على بيتنجان على ضلوع وليـــة وحب رمان وباگله وفد شي خارج الوصف ..
يگلي ويه ديرة الجدر بالصينية إندفرت الباب الخارجية ودخلوا الامريكان علينه يدورون على سلاح ومطلوبين .. وبعد مانخلوا البيت نخل مالگو شي واعتذروا من عدنه ، وقبل ميروحون اكو جندي ابو سمرة يباوع على صينية الدولمة ويسأل المترجم عن إسم هاي الاكلة وإذا بيها مجال يضوگ منها شوية ؟؟ فـ امي ، ومثل أي ام عراقية أصيلة گلتله إي يا بعد خالتك من عيوني ، وچان تروح للمطبخ وتجيب وياهه درزن مواعين وگامت تخلي بيهن دولمة وتنطي للقوة الامريكية المداهمة كلهم ، وگلتلهم هاي إسمها دولمة .. والأمريكان إتعجبوا على طعمها وكل شوية يسألون سؤال عليها لحد ماخلصوا مواعينهم وراحوا ..
يگول وراهه بشهر إندگت باب بيتنا ، فـ طلعت وإذا بيهم الامريكان نفسهم يريدون يحچـــــون ويه امي ، ومن طلعتلهم امي إنطوهه ٥٠٠ دولار وطلبوا منها تسويلهم جــــــدر دولمة ..
وامي لفطت الخمس اوراق ودزتنــــي للسوگ اتسوگ حوايج الدولمة ، وأمشي ( خائفا" أترقب ) وكل شوية أتلفت يمنه ويسرة لا واحد من الجوارين يكون شافنــــي وشاف امي نحچــــي ويه الامريكان وناخذ منهم دولارات ويروح يزلغني يم القاعدة وباجر من الصبح الگه راسي وراس امي معلگات بأقرب تيـــــل علينه .. والحمد لله ، الله عداهه بستر وسلامة ومحد عاتبنه أو سألنه ودز علينه ..
يگول وره شهر امي ظلت تحوص ، وكل شوية تگلــــي يمه روح للقاعدة الامركية وجيب الجدر مالتنه ، وآني كلش زين أعرف هي مو كاتلها الجدر انما ببالها بلكـــــي من اروح للامريكان واطلب الجدر مالنه يتذكروني ويشتهون الدولمة مال امي وينطونــــي خمس اوراق مرة ثانية حتى نسويلهم جدر ثاني !
وبعد ما امي شگت طيزي بالملحــة مالتها رحت للقاعدة وهناك لگيت الامريكي ابو سمرة وسئلته على جدر الدولمة مالتنه ، فـ أشرلي على قاعة چبيرة وگلي أدخل بهاي القاعة وأخذ الجدر المكتوب عليه إسمك ، ومن دخلت للقاعة لگيت بيها بالـ ٢٠٠ جدر دولمة مكتوب عليها أسماء اهل المنطقة كلهم وكان ابرزها وأهمها وأكبرها جدر الشيــــــــخ أبو الجامع اللي ناچنــ-ــــي نيـــ-ـــچ بمحـــ-ـــاربة المحتلين الامريكان وتحرير الارض من دنسهم !!.
إرجعلي زميلي المخرج ..

» ملف قصائد للشاعر الكوردي الراحل صديق شرو ترجمة واعداد: بدل رفو النمسا \ غراتس ملف قصائد للشاعر الكوردي الراحل صديق شرو شاعر لم يجرح صفحة النجوم وظل
» رحبوا معي اجمل ترحيب بالاستاذ الشاعرالشرقي ساكن
» Aug. 07, 2015 جهاز الأمن الروسي يصدر قائمة بأسماء الداعمين لتنظيم داعش بينهم الها
» السقوط
» شفايت النا لو قدوري النشال حاكمنا و ساكن المنطقة الخضراء!!