أخذ الشور من راس الثور !!! مثل كلش صحيح !!!
سيف الدين الألوسي
أخذ الشور من راس الثور !!! مثل كلش صحيح !!!
لكوني ابغض الدكتاتورية في اتخاذ القرارات ( طبعا هذه القرارات الديمقراطية هي اقل القرارات ،،، اما اكثرها فأتخذها بدكتاتورية ذات نيات حسنة مثل قرارات الباشا نوري السعيد الف رحمة عليه ! ) .
مثلا لدي عدة قرارات غبية بنية حسنة ، اتخذتها بعد استشارة وشور من رأس ثيران اصلية ،،، ساتذكر بعضها :
اذكر سفرة الى شمال العراق ايام الكلية ١٩٧٦، وسألت احد الضالعين في العلم ،، شنو احسن اوتيل بالشمال ،، گاللي اخذ بيت بصلاح الدين ، روعة ،، اخذت بيت ومعي بعض الاصدقاء ،، كلشي ميشتغل بي ،، حتى صوبة علاء الدين الوحيدة ( السفرة كانت بالشته ) ، هذه الصوبة مزنجرة وتنگط نفط وفتيلتها من فترة ما قبل الحرب الاولى ،، تطلع دخان وريحة اكثر من النار والحرارة ،،البطانيات محمضة ريحتها وكذلك الجراجف والمخاديد !! ،، السيفون مال الادب ميشتغل ،، الادب او الطهارة صاير لونها جوزي محل الابيض من النظافة واالكلوريكس ،، كراسي البيت والقريولات واكفه بالقدرة، وقريوله خاليها على طابوك !!!.
المهم النصيحة كانت بنفس مستوى الصوبة العنتيكة !!
النصيحة الثانية من احد روس الثور ،، هو تبديل سيارتي الجديدة نسبيا الرينو ١٢ سنة ١٩٧٥ بسيارة نوع اولدزموبيل تورنادو موديل ١٩٦٧ واعطاء فرق ٢٠٠ دينار !!
الاولدزموبيل النيلي حلوة جدا ، فيكه ،، طلعت بيها تراي ،، گيرها الاوتوماتيك يطفر ، دتشتغل تك وبيها ولف معلك ،، وتايراتها صايره چوابه !! كتله اني اريد فرق الفين فوك الرينو ،، الف مال فتح مكينة وگير ،، والف مال تايرات واجور تكسيات !!!!
اما النصيحة الثالثة من احد صماخات البقر ،، فعند نزولنا من وحدتنا العسكرية كتيبة الاستمكان بالمحاويل وكنا اربعة بالرينو وكان هو لابس بدلة قيافة بطانية خاكي ،ونحن الثلاثة بالعرضات وكان جالسا بجنبي ،، سنة ١٩٧٩، وعند نقطة تفتيش الدورة القديمة قرب الفلكة ،، كال انتوا لبسوا البيريات وكنا نواب عرفاء جدد جميعا وفرحانين برتبة الفريق الركن ،، قال انا مرح البس البيريه ، هسه عبالهم اني ضابط ويستعدون الزنابير لنا !!! بابه هذا مو خوش شقه ، مفاد ،، انت دوس ومعليك ،، لم ادوس وثگلت واذا بالزنابير يؤشرولنه بالوقوف ،، واني وگفت وهمزين مسمعت شورة الثور ،، وطلبوا هوياتنه ،، وچانوا ينزلونه من السيارة ورزاله خفيفة النه بعد ان عرفوا نحن خريجين ، اما هو فترزل رزاله تسوه عمره ولولا كلامنا الطيب مع ال ن ض د ٦حاروگه اصلي زنبور،، اللي راد يحبسنه كلنا ،، صدك چان اكل اسكالوب كوردن ....! ،،ولو هو يملك اقارب ضباط كبار جدا بهذاك الوكت .
نرجع السالفتنه ، ونرى ان اخذ الشور من روس الثيران والمطايا واللوگية القشامر ،، تدمر بلدان ودول وتهجج شعوب وتطيح حظ الما يطيح ،، ولنا في ذلك تجارب كثيرة !!!!!
ملاحظة : هذه اللوحة لراس الثور من مقتنياتي ببلاد التغرب ،،، يمكن هذا الثور اطرش !!!!!!!!
المشاركات
نقاط
التقييم
موضوع: أخذ الشور من راس الثور !!! مثل كلش صحيح !!!: سيف الدين الالوسي 
الأربعاء 29 ديسمبر 2021 - 22:24
