ولا خوف ولا يحزنون
سميح عزت
بعتنا لِك ياحكومة ..
تمانين مليون رسالة
تمانين مليون توسل
ولا حد فينا سأل
وكأنها رسايل
م الأرض للقمر
وكأننا عبيد ..
وانتِ فوق البشر
بعتنا لك ياريس
أحزان كتير بالجمله
وكأنك مش شايفنا
وكأنك مش سامعنا
واحنا بنصرخ أغثنا
الجوع شقق حلوقنا
بنموت وبندفن
واحنا بنصرخ وطن
طب ليه حاربت ليه
لما هاتسيب عصابه
تدفنا بالحيا ..
وبموتنا تحتفل ؟
وكأننا فى بلدنا
ساكنين إيجار جديد
عواله ع الوطن
مش ده نيلنا ووطنَّا !!؟
آدى النتيجة شوفها
واستشعر الخطر
واستشعر الخطر
واستشعر الخطر
الناس م الجوع هاتاكل
الأخضر والحجر
الناس م الكبت خارجه
بركان وبينفجر
****
ولا خوف ولا يحزنون
ياحكومة خلاص خلاص
تعبنا من النظام
اللى بيحكم علينا
بالقهر والانتظام
ف صفوف المعدمين
ويسيب أكلةْ لحومنا
علينا مطلقون
زى الديب اللى شارد
بينتِّـش فى اللى باقى
من لحمنا المقدد
ويحلِّى بالعظــام
مافيش سكوت خلاص
مافيش تعظيم سلام
لوعود تفضل كلام
مانشوفش منها حاجه
تروى فدادين شراقى
جوانا من زمان
ولا ييجى منها لقمه
تقوِّت الجعان
ولا مستشفى تداوينا
بغير الأسبرين
مافيش تعظيم سلام
وبلاش تعتميم كفايه
شيلوا الغِما وسيبونا
نقول أيوه ولأه ..
عايزين مصر اللى عشنا
نحلم بيها لبكره
لعيال بريئة لسه
بتبيعوا ف طفولتهم
وبتزرعوا ف عقولهم
تاريخ ماهوش تاريخنا
عايزين مصر الحقيقة
مش مصر الكدابين
عايزين مصر اللى شاريه
ولادها معززاهم ..
مش مصر البياعين
عايزين مصر الحضارة
مش مصر الأمريكان
عايزين مصر المساجد
عايزين مصر الكنايس
مش مصر العلمانيه
ولا مصر الصهيونية
عايزين مصر الأمان
عايزين مصر اختيارنا
اللى إديناها صوتنا
مش مصر اللى رسمتوا
صورتها ف برلمان
متفصل بالمقاس
على كل حد داس
علينا بالمداس
لجلن خاطر عيون
السلطة والوصول
لاخر تل الفلوس
على تلول الضحايا
من شعبنا الغلبان
ماحناش عايزين طوارىء
ماحناش عايزين سجون
للى يقول الصراحة
ويسأل إحنا مين
ويسأل إحنا فين
من العالم بتاعكم
ياساكنين القصور
وان كان لازم سجون
تبقى لروس الفساد
وطبيعى ده مكان
جميع المجرمين
****
ياحكومه خلاص كفايه
بنقولها بدون كسوف
ومافيش جوانا خوف
هانوصل للخلاص
الخوف جاسوس وإحنا
قبضنا على الجاسوس
مش راح نقبل نكون
تانى أبدا أضاحى
فى أعياد السيادة
ولا طينة فى المداس
واللى مفتح عيونه
وبيراقب خطانا
من الغربال يشوف
ويرحل قبل بكره
ما يتزال م الأساس
الشعب خلاص مصمم
مايكونش تور مُكمَّمْ
ومربوط من ودانه
فى الأوتاد والألوس
ولا " ثورة الجياع "
تكون ثورة رعاع
ولا ثورة على المعاش
المشاركات
نقاط
التقييم
موضوع: ولا خوف ولا يحزنون 
الخميس 27 يناير 2011 - 13:04
