(صرخة الجَّولان ـ عتابا) / للشاعر السوري الشعبي سلوم الياس سلوم

(صرخة الجَّولان ـ عتابا) / للشاعر السوري الشعبي سلوم الياس سلوم
----------------------------------------
من الجَّولان حامل هَمِّ حالة
عشت سنين حالة تسم ِّ حالي
لقاء الأهل كاس المرّ حالي
لقاء النَّصر ناطر يا أحباب
* * *
أنا منبت أرض كنعان سوري
بقدسي هبّ سوري عان سوري
ولمَّا الشَّام تنده عا نسوري
بوجه الشَّمس بتشكِّل حجاب

* * *
بنا القسَّام عزّ الدِّين نسرنا
لردّ الظُّلم عا فلسطين سرنا
وبأفعالو المجيدة الشَّهم سرَّنا
ورفع راياتنا فوق السَّحاب

* * *
عند ما سيف عزّتنا نصلنا
بقلب أخصامنا اغرسنا نصالنا
من عبء الوغى لا ما نصلنا
دوم علا العدا ننصل حراب

* * *
جبل حرمون ياشيخ بعمامة
ارتووا من نبعك اخوالي واعمامي
عدوَّك ينعمى انشالله بعمى ميّ
سودا ويقشع الدُّنيا ضباب

* * *
أنا من مجدل الشَّمس العريقة
ما بترك ضيعتي تبقى عَ ريقا
وإذا بطرح الصَّوت علا عريقة
يوافوني السِّباع من الهضاب

* * *
بجولاني انغرست بقلب حقلي
سندياني بثباتي المجد حقّ لي
الأرض عرضي ، بحديث الحقّ لي
تهون قبالها كلّ الصِّعاب

* * *
يا جولاني العزيمة والمراجل
ما هانت بعدها بتغلي المراجل

المرأة بقومنا لبوة المرا جلّ
سناء وغالية مثل الشَّباب

* * *
الجَّولان الرُّبى الأرض الخصيبة
وقعت في ظرف أعجف غصيبة
وبيوم الحسم لُو تلاقى الخصي بي
يذوق المرّ من سيفي شراب

* * *
فلسطين الطغت فيها العصابات
الصهيوني درس أرضا وعصى بات
وزعيم بقومنا شقّ العصا بات
يزيد بقومنا فتنة ومصاب

* * *

صفحة 1 من اصل 1