كنت في بغداد / الحلقة الثالثة - ميسون نعيم الرومي

كنت في بغداد / الحلقة الثالثة - ميسون نعيم الرومي

           

[size=32]             كنت في بغداد / الحلقة الثالثة[/size]
[size=32]   [/size]
[size=32]   [/size]
[size=32]      [/size]
اليوم أعزائي القراء اريد أن اكتب بلغة اهلنا ولنأخذ استراحة من معاناة الأهل في العراق و اخوتنا في بلاد الغربة ، فلكل منا همومه واحزانة ، وبعد سماعي آراء الكثير من اخوتنا العراقيين والنازحين الى مختلف دول العالم ، فكل له مآسيه وأشجانه ، وحتى مـَن ولـِدَ في تلك الدول له هموم أخرى . لسنا في صدد ذكرها الآن .
اليوم اتوجه بسؤالي الى الأطباء والمختصين لأني لم اجد تفسيرا يرضيني لهذه الحالات المرضية الغريبة وكأنها امفصلة وحسب المكان والزمان..!
          

انا اسكن السويد بلد معروف بنظافته وبالخدمات من الدرجه الأولى والأنسان مقدس في كافة الأعمار وخاصة الأطفال الذين تصرف عليهم الدولة من الحضانة الى ان ينهي مرحلة الدراسة المتوسطة (تعليم اجباري) ، وبعدها براحته ان اراد الأستمرار .. فالدراسة مجانية ،
    
أما رعاية  كبار السن فحدث ولا حرج ، لذلك انشوف مستوى الأعمار عندهم طويل (عزرائيل ايجر من جهة والخدمات اتجر من الجهة الثانية) علما ان السويد ليس بلد نفطي .
والسويد كباقي الدول التي تحترم الأنسان ، معروفة بقوانينها الوضعية التي تخدم الشعب.. يعني مو مثل قوانيننا حبر على ورق ابكيف القاضي والذي بدوره يخاف من رئيس القضاء الأعلى  المعشعش .. وبالجنوب انقول (گاف)على المنصب من قال او بـَـلـَة (يعني الدجاجه لما تحضن البيض ايسمونهه گافـَّه) ، خطيه مو بيده امبسمر على الكرسي (والربع داهنين بلعومه ابدهن خروع) أما الإدعاء العام خليه على صفحة .. *(خالسه العباس) ..
 [size=32]أعزائي .. اهلنا علمونه نعرف السمكة الطازجة من راسها ، هسه الخياس وصل الى الذيل..[/size]
يا جماعة الخير هذا قلمي ايغافلني ويشطح ، العتب على القلم ..
نرجع الى سالفتنه....
ظهرت عندنا امراض غريبة  مغص في البطن وارتباك في الأمعاء هذه لما نشرب الحليب
والحليب امبستر وامعقم ومحفوظ بعلب وآخر نظافه الطبيب يقول حساسية من اللآكتوس الموجود في الحليب يابه شربوا حليب خالي من (المحصن) اللآكتوس..
زين بعد الحمام والماء الحار والبارد اربعة وعشرين ساعة شغال ومعقم وعليه رقابة وفحص .. والسويد من البلدان القليلة الذي يشرب شعبها مباشرة من (الحنفية) لان الماء صالح للشرب ، يعني بعد الحمام والأنتعاش بالماء الغزير تشتغل الحكة اتقول بعوض العالم كله عشعش ابجلدك ليش .. ايگلك حساسية .. اشلون بلوه ...
من الصابون ومن الجفاف يابه اشترينه صابون خاص يحتوي على الكريم واضافة الى ذالك انواع الكريمات ام العطر وبدون عطر، واللي يدخل للحمام اتقول داخل مركز للمساج .. او لو اكو برميل اكريم واحد بعد الحمام يدخل بي اشويه تسهل الشغله ، والعيون .. لازم يوميه قطره مرطبه ، چا اشبيها اعيونه يبست ؟
       
اشو بالعراق الحراره اكثر من 50 والكهرباء تلعب ختيله تشتغل واهناك تاخذ غفوه وعلى هالرنه صار14 سنه صرفوا عليها مليارات ولا محطه انبنت .. اشو اعيونه تلمع مثل اللگلوبات لا جفاف ولا هم يحزنزن .
او بعد .. حساسية الصدر اتشوف الصدر (ايوصوص) عبالك بي اعشاش عصافير ما لاگيه اتوكل افراخها .. سموها (الربو) زين الجو نقي لا تراب مثل وطنه اللي هجمت عليه اتربة الصحراء بعد ان حركتها حرب الخليج اللي ماتوا واتشردوا بيها الملايين وكسرت ظهر شعبنه.. (عساها ابخت اللي سواها)...لعد اشبينه مخنوگين ! صدگ لو گالوْ ممتعلمين على الدلال .. قابل گوَّه؟
لتستعجلون عليـَّه لم انته بعد .. سامعين بحساسية اللگلوتين ..؟ حساسيات آخر زمن
حسره علينه ناكل خبزه ايگلك حساسية من الحبوب ، اتحولنه الى اسيويين انبنت أمعائنا بالرز يعني (التمن) اتگول سمنت ... ليش هيـَّه خلصت ! فد يوم صحيت من النوم باوعت بالمرايه .. ما عرفتني ..!
امنقطه احمر، صابتني رجفه وانرعبت ! خطيه منعديه حصبة ، بعدين حسيت على نفسي ، آني امحصبه من كنت طفلة ، اوركض للمستشفى ، الطبيب سألني اشماكله ؟ اتذكرت بالليل اكلت مكسرات ، يعني جوز ولوز، يابه طلع اكو حساسية المكسرات .. بس لتخلطون مو قصدي امكسرات الحكومة والنواب اللي لاعبين طوبه بالشعب ويعملون كل الموبقات ...
والطرگاعة باسم الدين و بالسكته يعني جوه العبايه ، الهم حصه ابكلشي اوكلاشي ، حتى بالملاهي الليليه..

      
رباط الكلام لما رحت الى بغداد .. اشو حليب اولبن ابو الگشوة وگيمر وكاهي وخبز تنور امگسب وبقلاوه ومن السما ابو الفستق ، ويومية صينية خضرة او خبز بحيث ام الخضرة اتعجبت ومـَـتـْحـَمـْلـَت سألت .. عمي شتسوون ابهاذي الخضرة يوميه؟ اقاربنا خاف علينه من العين والحسد *(لا نتهورش) قال عمي عدنه خروف (خلف الله عليه من زود المحبه يقلق علينه)...

            

اتذكرت .. لما نغسل بالحمام نگعد على التخته ، ونملي السطل والطشت .. أكيد اتعرفون لأن المي قليل وميوصل الى الدوش والصابون الله واعلم يمكن امسوينه من دهن السيارات والشامبو خليهه على الله وابنص الغسل تنقطع الكهرباء... والعجيبه اشمحلاهه لااكريم ولا حكه والجلد يلمع رباني...
كل هذا اللي گلته وكل هذا الأكل اشو لا حساسيية ، ولا وجع ، والشعر يلمع ولا شعره توگع وعلى ذكر الشعراللي طول عمرنه ومن وكت الجدات ، البنات گصايبهن وازلوفهن طالعه من العبايه اللي اتهفهف على الراس ، هالأيام هذا الشعر الحلو صاير اسمه (عوره)..
    
وقبل فتره بالامتحانات الوزارية ابتموز والحراره اكثر من خمسين ، وبدون تبريد بس بنكه والطلاب امفرفحين من الحر، الشباب نزعوا القمصان وبقو بالفانيله الداخلية اما البنات المسكينات املفلفات بالحجاب والحر يشوي .. وحده من البنات فرفحت من الحر وماتت.. ودفتر الامتحانات بيدها ينتظر الدرجات.... سوده على الحرامية سارقين ثروات الشعب
اي والله الحچي بالتفاطين اهناك في بغداد نطلع نمشي ساعات لا وجع ولا ضوجه وامكيفين وبالليل انام نوم  مريح نسينه شنو (أرق) شنوحبوب منوم ..
بالله عليكم سامعين  بمرض (القولون الزعلان) الخابصنه بالسويد .. الذي ذكرني بزعل  سياسيين العراق فوگ سرقة المليارات الهم رنـَّـه.. يوميّه مصالحة وطنيه خصصولهم مليارات فوگ المليارات اللي باگوههه .. حتى يتصالحون الأفنديه (اشلون درب للبوگ) فاقترضوا مليارات من صندوق النقد الدولي  حتى ايراضوهم لأن الميزانيه صفروها وحتى الأحتياطي النقدي بلعوه(عساكم متتصالحون ).
نرجع على بيت القصيد مرض مدري مو مرض المهم اسمها حساسيه يقولون الحساسية .. ان جهاز المناعة ايهاجم الجسم يعني جسمنه يتحارب وي بعضه
الظاهر انتقلت الى جسمنه عدوى الحروب في وطننا والذي يطلع من حرب ويدخل في حرب والموت والينة والدم للركب ... كله ابراس ولد الخايبه ايخلفن وايكبرن والحرب تطحن ، ملايين الشهداء والأرامل ، والأيتام اتشوفهم يتطافرون بالشوارع بدون اية رعاية ، وابجال حكومة الحرامية اصبح العراق يغص بأطفال الشوارع ، والأميه متفشية ، والبطالة حدث ولا حرج .. وانوبه المخدرات (خري مري) من الجارة اللعينة.
يعني ايصير معيل العائلة يستشهد وعائلته اتسيب بالشوارع لا راتب تقاعدي ولا رعايه ... طبعا خزينة الدوله بالدوب تكفي رواتب الحبربش وحراسهم واطبائهم وعمليات التجميل ، نسوان اوزلم (هو الوجه امصخم ينفعه تجميل) .. امنين ينطون للشعب .. وحتى الحج على حساب الشعب شايفيين واحد ايحج بفلوس السرقة؟....( اخر زمان) .
أخيرا وليس آخرا (انقل لكم مقطعا من مقالة محافظ البنك المركزي العراقي السابق (الدكتورسنان الشبيبي) :-
” ان رئيس الوزراء السابق وزعيم ائتلاف دولة القانون “نوري المالكي“ تسلم أموالا أكثر من كل حكام جمهورية العراق “مجتمعين” من الزعيم عبدالكريم قاسم الى صدام حسين، واهدرها.
وقال الشبيبي، إن “الاموال التي تسلمها المالكي كانت تكفي لبناء وطن جديد...
 يتسع لـ 30 مليون نسمة يكون أمنية لكل البشر في العالم ، مبينا ان المالكي عيَّن أربعة من أفراد حزبه الحاكم بمناصب كبيرة داخل البنك المركزي وهم ليسوا من ذوي الإختصاص حتى تأثر البنك المركزي وأخذت العشوائية تضرب أطنابها ، وهم مدير دائرة غسيل الأموال، ومدير الدائرة القانونية، ومدير مراقبة المصارف، ومدير الدائرة الاقتصادية، لافتا الى أن الفساد أخذ يستشري داخل البنك المركزي من قبل زملاء المالكي في الحزب”..... والذي يريد اكمال هذه المقالة المهمة والمفصلة موجودة على النت)-
 
نرجع على سالفة الحساسية وننتظر رأي الأطباء في هذا الموضوع
ولكم جزيل الشكر والتقدير
-------------------------------
*خالسه:- راعبه (من الرعب)-
*(لا نتهورش):- اسم الله على السامع يعني اجلكم الله(اسهال وتقيأ)-
-------------------------------
2017 ســـتوكهولم

[size=32]للراغبين الأطلاع على الحلقة السابقة:[/size]

http://algardenia.com/2014-04-04-19-52-20/qosqsah/31674-2017-08-29-11-09-04.html