حجي عزوز والكعبة ماعندي وكت ، انكمل سالفتك باچر!! جلال جرمكا

حجي عزوز والكعبة ماعندي وكت ، انكمل سالفتك باچر!!

حجي عزوز والكعبة ماعندي وكت ، انكمل سالفتك باچر!!
الف رحمة على روحك حجي عزيز(عزوز) اللي كان يحمل كل الصفات الحميدة من وفاء واخلاص و روح التعاون والجيرة و السخاء و الكرم ..الخ.
كانت عنده سيارة الله وكيلكم ما كنا نعرف لاموديلها ولا أسمها!!.
تك باب و صغيرة ومن يدير السلف كل المحلة لازم تعرف انه حجي عزوز يريد يطلع و انشاءالله تشتغل بسرعة لأن أغلب الأحيان يحتاج الى دفعة صغيرة!! بس الله لايراويكم دفعته الصغيرة يمكن لمسافة مئات الأمتار بحيث واحدنة توگع حيلة وينتهي!!.
هذه كلها سهلة گدام طيبة حجي عزوز ولكن المشكلة من يوگفك بالطريق ويگوم يحچيلك!!.
فد يوم لگيته وجه بوجه شايلة علاگة خوص و مليانه خضراوات وفواكه وغيرها .
بعد السلام و التحية ، ابتليت على عمري وسألته:
- حجي أشو مشي..لعد وين سيارتك؟؟
هو سألته سؤال لو ابتليت على عمري..رد على:
- وليدي السيارة عند الفيتر ، صدگني گبل شهر بدلت الفيتبمب، الله لاينطيهم الصوچ مو من الفيتر خطية الفيتر شعليه؟؟ الصوچ من أبو المواد الأحتياطية اللي مواده كلها مغشوشة و ماتعمر وهي بالأساس مكتوب عالباكيت الماني ( جرمني) لو شغل أبو ناجي ، ومن تجي للواقع كلها صناعة صينية درجة رابعة و سكراب ومابيها خير!!.
مو بس الأدوات الأحتياطية ، ليش تروح بعيد گبل أيام دأطلع من الگراج ما أدري شلون كسرت عاليسرة و هناك طخيت باب الگراج و چان يوگع عبالك كارتون مو حديد!!.
وليدي كلشي مغشوش أيام زمان الباب يعمر سنوات هسة ماكو كم سنة ويزنجر و لازم تبدله.
هذاك اليوم عود رحت أجيب گيمر وصمون و الجهال عندهم مدرسة ، ما كذبت خبر ركبت السيارة و المشكلة أم الگيمر (جاسمية) ما جاية ، هم حقها تجي من الفضيلية* بالبيكب والله اليعلم أبو البيكب أمزيد الأجرة وبطلت تجي!!.
لو تريد الصدگ أبو البيكب هم حقه كلشي غالي من البنزين الى التايرات والفيتر والأدوات الأحتياطية .. والشوارع كلها حفر و طسات!!.
هم زين ،الدكتارة يگولون أكل الگيمر يوميا مو زين كودن يزيد الدهونات بالدم ، و شخصيا ما أصدگ ، أريد أعرف شنو علاقة الگيمر بالدم؟؟!!.
گلت مو مشكلة أشتري الصمون وأروح على حجي خضير أخذلي طبقة بيض.
يا حجي خضير أكو واحد وبهالحر يخلي البيض برة ؟؟ مو الدنيا مشتعلة وشهر تموز ،اي غير تخلين بالبراد!!.
وداعتك رجعت ولابيضة بيها خير كلها فاسدة من الحر ، ذبيناها بتنكة الزبل!!.
هو ليش أبو الزبل يجي كل يوم مثل گبل؟؟؟.
لايابة لاء واحدهم عبالك مدير عام ومايتحچى، بالعظيم كل أسبوع لازم ننطيهم أكرامية حتى يشيلون الزبل ، مو صوچهم صوچ أبو الأمانة اللي مايحاسبهم ، أي مو واحدهم ياخذلة كومة دنانير ويقبض معاشة كل شهر عليش هالأكرامية ما أعرف؟؟!!.
هذه تذكرني بسالفة قديمة....
بالحقيقة ماخليته يكمل وگلتله:
- حجي عزوز فدوة أروحلك ترة عندي دوام خليها باجر بأذن الله أحجيلي السالفة !!.
بعد ذاك اليوم كلما چنت أشوفه من بعيد أجنبه و أغير طريقي.
رباط السالفة:
الأخ ومهجة القلب الحاج (ابراهيم اشيقر الجعفري) وزير الخارجية أمر من حجي عزوز بعشرات المرات.
الصحفي يبتلي ويسأله سؤال عن علاقة العراق بالدول العربية.
عبالكم رأسا يرد عليه؟؟؟
لايابة لاء،اذا مايسمعه كم جملة غير مفيدة من اللي أمحضرها قبل المؤتمر الصحفي فلا يرد .
ان المنحيات التي كان تتمختر في ربوع هذه الدول بسبب تعاليهم وكبرياتهم والتي تبخرت بمجرد حركة من قبل الأخوة ما شفنا غير تعدلت الأمور بالصيغة التي ترضي الجميع لابل لاقت أستحسان الدول الأقليمية و دول الجوار ايضا .. شكراً للجمهورية الأسلامية لكون الدجلة والفرات تنبعان من هناك.. و سلمتهم يا أم حسن!!.
أخوية أسطة جعفري ، الله يرضى عليك وين رحت؟؟ ومنو اللي يفهم قصدك؟؟، بالعظيم حجي عزوز كان أفهم و أكثر دراية منك بكل الأمور اقلاها من كان يحچي نفهم عليه وقصده واضح وضوح الشمس ، أما أنت وحق الحق يراد انجيب كذا محلل سياسي و نفسي حتى نفهم جملة وحدة من تصريحاتك!!.
الف رحمة على روحك حجي عزوز تعال وشوف رئيس الدبلوماسية العراقية واحد أمسودن عالأخر ومحترك به الفيتمبت و الواتربمب والمعضلة ماكو لا صناعة المانية ولا أبو ناجي.
- لعد شكو؟؟
فقط ساخت ايران وبس!!.
هذه مشكلة چبيرة ،هو أكو شى نستورده من ايران وبي خير؟؟ ، أكبر دليل شوف الأخوة اللي يحكمون العراق واحدهم گبل مايجي من ايران ويدخل العراق كان أكس باير!!.
الى اللقاء في (فيتبمب أخر) عذرا حلقة اخرى وفي أما الله.
أخوكم
رئيس التحرير
*الفضيلية: مدينة بأطراف بغداد أهلها يملكون عدد كبير من الجواميس .

» ماينقذنا غير (حفش) وما أدراكم ما حفش؟؟! جلال جرمكا
» محيسن لبلبان بالكِردي!!! جلال جرمكا
» عمو فرج ، عسلك خوش عسل بس للأسف مغشوش!!! جلال جرمكا
» عمي هذا سيد ومن سلالة الرسول (ص) معقولة هيج يسووي!؟؟ : جلال جرمكا
» عمي نزل الزمال من السطح.. مادگلي شلون صعدته؟؟؟ : جلال جرمكا

صفحة 1 من اصل 1