سوالف من بغداد قديما !!!! كراج ابو خاطر !!
سيف الدين الألوسي
سوالف من بغداد قديما !!!! كراج ابو خاطر !!
في بداية السبعينيات وقبل ان تصدر اجازتي للسوق سنة ١٩٧٤ ،، كنت أخذ سيارة والدي الامبالا ٦٥ للغسل والتشحيم في گراج ابو خاطر او كراج الخيام في السنك !!! كان دهن السيارات العراقي يعلب في قواطي تنك سعة غالون وارباع الغالون ، والقواطي ٤٠ لونها احمر ومن احسن انواع الدهون في الشرق الاوسط ، كان ينتج في درجات حسب الكثافة ، ففي الصيف درجة ٤٠ ، او الاخضر٥٠ ( ٥٠ يستعمل للديزل ) ، وفي الشتاء درجة ٣٠ ،،،،،،، عندما تخرج السيارة من احد هذين الكراجين ، تطلع چنها عروس من النظافة ومزينة بريحة الگاز الذي تم غسل المكينة به! وخصوصا اذا بها هورن هوه خمس نغمات !!!! ،،، فكنت استغل الموقف واخذلي فرة في بغداد !!! قد لا يعلم البعض بأن هذه الدهون والمنتجات العراقية كانت تهرب الى الاردن وسوريا والكويت والسعودية لجودتها !!!!!!!
كانت كراجات الغسل والتشحيم تربط كارتات مدورة بخيوط في ذراع الستيرن ، مسجلة في هذا الكارت ، عدد الكيلومترات عند تبديل الدهن ، وتبديل السي اويل والتشحيم ، وحتى يعرف صاحب السيارة الموعد القادم للادامة !!!
في احد المرات اتت امرأة تسوق أوبل كاديت صغيرة الى كراج ابو خاطر ،، لون سيارتها اخضر فاتح ، جلست تشرب الشاي في منطقة الاستراحة لحين انتهاء غسل وتشحيم سيارتها ،،،، تعرفت عليها ودك سوالف وعرفت انها مدرسة في احد مدارس البنات ( راهبات التقدمة ) ،،، سألتها عن بنية وكلتلها هايه كرايبي ديري بالج عليها !!!! اجابتني ،،، هذا الحجي مشي على غيري ، هاي الكاعد تسأل عليها اكبر ثولة ودماغسز !!!! وراحت للسيارة وجلبت اوراق الامتحان ودفتر الدرجات ،،، وگالتلي باوع ،ماخذه بالخمسين !!!!! كلتلها ست فدوة الخاطري فد جم درجة لخاطر ابو خاطر مو لخاطري ،،،،،،، سويها ستين !!!!! خربت من الضحك وگالت هاي لخاطرك ستين !!! صحت العامل كتله مشي الست گبلي واريدك تغسل سيارتها غسلة بعد سنة متتوسخ !!! رأيتها بعد سنوات في نادي الهندية ،،، رحمها تعالى ان كانت متوفية واعطاها طول العمر اذا لا تزال عايشة ،،،،،،،،،،،، مع الاسف لم اعرف اسمها !!!
سيدات ومربيات الزمن الجميل !!
كل الود للجميع .
المشاركات
نقاط
التقييم
موضوع: سوالف من بغداد قديما !!!! كراج ابو خاطر !! : سيف الدين الالوسي 
السبت 7 أغسطس 2021 - 0:07
