منو يعالج مطشر المسكين؟؟ ما أظن اله علاج!!.

منو يعالج مطشر المسكين؟؟ ما أظن اله علاج!!.

 

حناني ميــــــا كتب:

منو يعالج مطشر المسكين؟؟ ما أظن اله علاج!!.

      
[size=32]  منو يعالج مطشر المسكين؟؟ ما أظن اله علاج!!.[/size]
[size=32]  [/size]
[size=32]ياجماعة الخير يگولون لكل داء دواء..[/size]
نعم هيچي يگولون ولكن صدگوني أكو أكثر من داء مالها أي دواء ، هسه أكيد راح أدگولون الداء اللي موجود داخل أسوار المنطقة الخضراء  ومصابين به من أصغر موظف الى أكبر راس بيهم من رئاسات الثلاث وقادة أحزاب وبرلمانيين ووزراء وغيرهم.
نعم هذولة واحدهم حاله حال المسكين مطشر اللي دائه ما الها أي دواء في انحاء المعمورة والله لو أنعرض على أكبر الأطباء من حملة الشهادات العليا وبكل ألأختصاصات فلا يتعالج لا وحق الحق!!.
[size=32]ياترى شنهو سالفة  مطشراللي مايصيرله جارة؟؟[/size]
بأختصار مطشر المسكين كان محاسب بدائرة سكك الحديد بالعاصمة وكان له خدمة لعقود من السنين وفجأة فد ليلة گعد واذا ناسي كلشي وكلاشي حتى أبسط الأشياء ، لذلك غاب عن الدوام وبعد كم يوم أجا عليه صديقه حتى يتفقده وأذا بمطشر گاعد وصافن ويه روحة بشقته في احدى المناطق الشعبية.
حال مطشر غير حال.. بعد السلام والتحية واسئلة و استفسارات يتعرف على صديقه و يتذكر بأنه موظف وصارله كم يوم غايب عن الدوام!!.
رجع للدوام وياريت لو ماراجع.. گام يخيط و يخربط ..ولا چنه هذاك مطشر المرح الشاطر، لذلك دائرته قررت احالته على التقاعد.
مشكلة  مطشر والحالة الغريبة أو المرض الغريب سببه عملاء ايران وأمريكا والتفكير الزايد ومصير اهله وناسه وأكاذيب وعنتريات المسؤلين اللي واحدهم مايرتبط بأية صلة لابالعراق ولا بالعراقيين ، لأنه عراقي أصيل و يحب العراق و ومتأثر على اللي دايجري في كل المجالات فكان يقضي الليل كله يسمع الأخبار ويقرأ الجرايد و يجر حسرات و حسرات والنتيجة شاف اليوم أحسن من باچر و البلد راح وماله اي چارة!!..
[size=32]مرض مطشر العجيب انه ينسى ويسبب مشاكل الى نفسه مثلا:[/size]
- فديوم ديضرب اوتي وهناك رن التلفون.. تدرون شصار و شسوى؟؟.
بدلا من يروح يرفع السماعة خلا الأوتي على خده ويصيح الو،الو، منو عالخط !!.
وينلزك الأوتي على خده وگبت العيطة!!.
ياخذوا للمستشفى وخده محروق بدرجة عالية وحتى قسم السفلي من أذانه!!.
[size=32]ولك شلون وياك  مطشرو تاليها!!؟؟[/size]
والله شأسوي بدل الأوتي عبالي جهاز التلفون بأيدي ، لعد شأسوي ما أرد على المكالمة ، يعني شلون؟؟.
- فد يوم اجت أخته والجهال يزورون خالهم.
مطشر حلف إلا يروح ويجبلهم كباب و دجاجة مشوية.
تدرون شصار؟؟
قفل عليهم الباب ونزل للشارع ونسى كلشي..
أولا گعد بالگهوة ولعب كم داس دومنة وطاولي وبعدين راح ويه صديقة الى هذاك الصوب وحديقة الزوراء مارجع إلا تالي الليل وخطاره ميتين جوع والباب مقفول من بره!!.
[size=32]ولك شلون وياك  مطشر؟؟؟.[/size]
شمدريني نسيتهم ولا أبالي انه رضيعتي و الجهال عندي وهسه شصار باچر من الصبح اروح اجيبلهم گيمر وكاهي!!.
اخته ما كذبت خبر من الغبشة ومطشر بسابع نومه أخذت الجهال ورجعت لبيتها و التوبه اذا كررت الزيارة!!.
- ضاج من گعدت البيت و الگهوة ،و نصحه أكثر من واحد أن يبدل جو الروتين لذلك قرر ان يروح الى بعگوبة عند اخوه ويقضي كم يوم ببستانهم والتمتع بالمناظر الحلوة يجوز تتحسن حالته شوية!!..
راح الى گراج علاوي الحلة وركب أول باص وهناك بعد ساعات ماشاف نفسه إلا بالديوانية!!.
ولك مطشر انت تعرف كلش زين باصات بعگوبة بگراج النهضة شوداك الى العلاوي؟؟.
يامعودين شمعرفني والله العظيم عبالي بذاك الصوب!!.
- كان عنده مراجعة الى دائرة التقاعد ، راح من الصبح بعد الموظفين ماجايين للدوام ، گعد بالباب وينتظر ، ساعات وباب الدائرة مقفولة.
هناك وأجه واحد وسأله :أخوية ، خير ،شكو عندك هنا..؟؟.
جاوبه مطشر أنه عنده مراجعة والموظفين ماجايين ودينتظرهم.
أخوية يا موظفين مو اليوم جمعة!!.
شلون وياك يا مطشر حتى أيام ألأسبوع تاهن عليك؟؟.
شمدريني عبالي اليوم ثلاثاء!!.
سوالف مطشر ما تخلص يرادلهن قاموس چبير...
مسكين يا مطشر الله لاينطيهم بالدنيا و أخرة...
[size=32]ياجماعة الخير:[/size]
مطشر شخص مسالم فقد وظيفته وصحته و ما أمأذي غير نفسه ويمكن يجي يوم يتحسن وترجع عافيته ولكن ياترى منهو يصلح حرامية وجواسيس المنطقة الخضراء؟؟.
سمعت والعهدة على الراوي انه المخابرات الأمريكية طشت عليهم دوا وصار واحدهم يفقد الكرامة والغيرة ويتحرك كأنه رجل آلي  ومايفكر إلا بجمع الأموال والسرقة والسفر و تعدد الزوجات وشراء عقارات بدبي ولندن و طهران و بيروت و الولاء لأمريكا وايران وبس!!.
[size=32]اللهم يا الهي أشفي مطشر اللي هو مو بس شخص واحد لابل باآلاف وأكثر وبكل مدن العراق من زاخو الى الفاو..أما العملاء و الجواسيس ياربي ذب عليهم المزيد من الأمراض من ضمنها لو ياخذون الف حباية فياغرا ماكو نتيجة!!.[/size]
[size=32]أما أنت عزيزي مطشر:[/size]
مو بس أنت مطشر وكيلك أبو الجوادين كلنا أطشرنا بدول العالم وننتظر معجزة حتى نجتمع مرة ثانية بديرتنا.. الله يكون بعونك و بعونا!!.
گولوا آمين يارب العالمين..
[size=32]اودعناكم عيوني الى سالفة جديدة..[/size]
[size=32]أخوكم[/size]
[size=32]رئيس التحرير[/size]